Medallas, placas —de rúas e conmemorativas—, diplomas —entre eles vintecinco doutoramentos Honoris Causa—, esculturas, trofeos, chaves de cidades, insignias e unha pequena colección téxtil de uniformes e togas conforman un conxunto de orixinal valor e significado, que foi reunido por, posiblemente, un dos escritores máis condecorados da literatura española de todos os tempos, que chegou a ser recoñecido como tal polo Guinness World Records 1994, contabilizándose nesa data 182 recoñecementos.
O interese de Camilo José Cela por conservar todo tipo de obxectos cotiáns ou curiosos queda patente nas orixinais coleccións que se conservan na Fundación: botellas dedicadas por grandes personaxes da cultura, como Picasso ou Hemingway; necrolóxicas insólitas; caixas de mistos ou de latón; cromos; billetes de lotería; selos; bitolas; moedas e un longo etcétera, que nos axudan a comprender o orixinal universo celiano que tanto asombra a uns e a outros.